ម្សិលមិញ ខ្ញុំឃើញបងប្អូនខ្មែរឥស្លាមយើង រាយមងក្នុងទន្លេបានត្រីខ្ជឹង១ និង ត្រីឆ្លាំង១ ធាត់ទ្រលុកៗ ហើយខ្ញុំក៍ចែកទិញពីពួកគេ ដើម្បីយកមកធ្វើម្ហូប អោយប្លែកមាត់…។
ត្រីខ្ជឹង ខ្ញុំយកមកស្រុះទឹកក្តៅអោយអស់ក្រឡា កុំអោយដូចពស់ថ្លាន់ពេក… គិតថា នឹងយកវាទៅស្ងោរជ្រក់ត្រយូងចេក អោយជ្រះមាត់ម្តង…។ ឯត្រីឆ្លាំង វះពោះវា លាងច្បូតទឹកអំបិលលាយទឹកក្រូចឆ្មារ អោយកាត់ឆ្អាប រួចអាំងអត់បង្ខំលើរងើក ភ្លើង…។ ខ្ញុំដើរទៅក្រោយផ្ទះ ទៅអើតរកមើលក្តិបសន្តាន់ បេះបានបួនដប់ផ្លែ… គិតថា នឹងបុកវារួចដាក់ទឹកត្រី ញិចម្ទេសអោយហិរបន្តិច ដើម្បីផ្ទាប់ជាមួយត្រីឆ្លាំងអាំង… អស់លោកអ្នកអាចស្រមៃទៅដល់ពេលដែលម្ហូបខ្មែរទាំងពីរមុខនេះឆ្អិនទៅ តើនឹងមានរសជាតិយ៉ាងណា?… ខ្ញុំមិនហ៊ានដាក់បង្ហាញរូបម្ហូបទាំងពីរមុខនេះ ក្រោយពេលចំអិនទេ ព្រោះខ្ញុំខ្លាចអស់លោកអ្នកដែលកំពុងរស់នៅស្រុកក្រៅ ទប់មិនបានពីការនឹករលឹកមកស្រុកកំណើត ជាពិសេស នឹកដល់ក្តិបសន្តាន់ខ្មែរ ដ៏មានឳជារស…៕
No comments:
New comments are not allowed.